مازالت تصريحات الفنان يوسف الشريف التي أكد فيها رفضه لأداء المشاهد الساخنة، تثير الجدل وردود الأفعال المتضاربة، فبعد تصريحات المنتج مدحت العدل التي انتقد فيها الشريف، خرجت الفنانة مي كساب لتدافع عن موقف زميلها.

وقالت مي عبر حسابها الرسمي على تويتر: "في يوم بابا صلاح عبد الله زعقلي وقالي ما تقوليش رأيك في زميل أو شغله أو آرائه ما يصحش عيب قولتله حاضر مش هاعمل كده تاني. النهارده حسيت جدا بكلامه.. ايه الهبل ده ايه الأوفر ده انتو مالكم بيوسف الشريف مضايقكم قوي كده ليه هوه  حر بتطالبوا بالحرية والديمقراطية بمنتهي الديكتاتورية".

وكان النجم يوسف الشريف قد أكد على تصريحات تليفزيونية أنه يضع بندا في عقوده لعدم تقديم مشاهد ساخنة وهو ما انتقده كل من الكاتب وحيد حامد والمنتج مدحت العدل.

وقال وحيد حامد في حوار منذ أيام: "مش عايز يشتغل الشغلانة دي ميشتغلش.. انت شايف إن التمثيل مش مناسب ليك سيبها وروح اشتغل في حته تانية".

وتابع: "ليس من حق الممثل أن يفرض ما يريده  أو شروطه على النص، فعلى سبيل المثال كان هناك مشهد في الجماعة 2 رفض ممثل تقديمه قولت ليه مع الف سلامه ثم جاء ممثل آخر عمل الدور".

وأضاف: "ازاي تعمل لممثلة ميكياج دون أن تلمسها انت قبلت بالمهنة بتاعتك وهي كده، ودي كذبة كبيرة لأني اتحدى أن هذا الممثل يبرز عقد من عقوده، وأنه يكون اشترط على المنتج  تامر مرسي هذا الشرط، هو عايز ينشر فكر ضال ومتشدد، يعني معنى ذلك لا يوجد طبيب يلمس مريضة في مشفى".

وأيضا المنتج مدحت العدل علق على تصريحات يوسف، وقال:"حضرتك قررت تمثل من غير ما تلمس ست إنت حر، والمخرج قبل والمنتج موافق، لكن لما تطلع تقول كده تصبح وكأنك تدين بشكل ضمني الممثل الآخر الذي سيوافق على تقديم الدور".

وأضاف: "أنت كده بتقول أنا بطل وأخلاقي حتى من غير ما تصرح بهذا بشكل صريح، انت قولت مش بلمس ست فصفقوا لك".

وكان الفنان يوسف الشريف، قد قال خلال استضافته في برنامج "مساء دي إم سي" المذاع على فضائية "دي إم سي": "في قيود أنا بحطها لنفسي زيادة عن أي حد تاني، ودي حقيقة حتى لو وصلت لدرجة العقود، دي حقيقة بقالها 10 سنين أو أكتر، ده من بعد فيلم هي فوضى، بدأت أفكر بالطريقة دي".

وتابع: "دي حرية شخصية طالما مبضرش حد.. أنا مبستريحش لو بقى فيه مشاهد ساخنة أو فيها قبلات.. دي قاعدة بطبقها على نفسي بس.. بدأت أحط قيود لأن قبل كده في منتجين اتفقت معاهم على ده ووقت التنفيذ غيروا كلامهم".

وأضاف: "وهنا أنا لا أزايد على زملائي أو إني أحسن منهم، بالعكس كلهم ليهم الاحترام ومنهم من يقدمون أعمالا محترمة دون أن يتعمدوا هذه الطريقة.. عشان بس الكلام ميتفهمش إني بزايد عليهم أو بقول إني أحسن منهم.. خالص".