اتجهت الأنظار في الأونة الأخيرة إلى أغنية "حاجة مستخبية" وكانت في البداية بسبب سرقة مهرجان "بنت الجيران" الذي حقق نجاحًا كبيرًا لحن الأغنية. 

وتصاعد الأمر عندما نشر الفنان محمود التهامي؛ نقيب المنشدين، فيديو عبر صفحته بموقع التواصل الاجتماعي "فيس بوك" يهاجم فيه اغاني المهرجانات لتأثيرها على الذوق العام. 

وفي نهاية الفيديو، أشار إلى لحن اغنية "حاجة مستخبية" للفنان محمد حماقي، مسروق من لحن اغنية إسرائيلية، وأدرج في نهاية الفيديو أغنية "بنت الجيران"، والأغنية الاسرائيلية. 

وعن حقيقة سرقة لحن اغنية "حاجة مستخبية"، قال الملحن مدين، عبر حسابه الرسمي بموقع "إنستجرام": "فيه موضوع كل الناس بتتكلم عنه إلا أنا رغم أن أنا صاحب الموضوع وهو لحن "حاجة مستخبية"، واللحن التركي والإسرائيلي كمان ومهرجان "بنت الجيران"، بس أنا ساكت عشان ما بحبش أعمل شو عالفاضي".

وأشار خلال التعليق، إلى هجوم الموسيقار حلمي بكر، على الأغنية خلال لقائه مع الإعلامي عمرو أديب، ببرنامج "الحكاية" المذاع عبر شاشة mbc، الذي قال في تصريحاته أن لحن أغنية "حاجة مستخبية"، لم يحقق النجاح مع المطرب "حماقي"، وان اللحن ده مسروق من لحن تركي".

ووجه مدين، رسالة إلى حلمي بكر، جاء فيها: "عايز أقوله يا استاذ حلمي اللي حضرتك ما تعرفهوش ان الحمد لله لحن "حاجة مستخبية" كان مع مطرب كبير مش نكرة وهو الفنان الكبير محمد حماقي، وحقق نجاح كبير جدا في مصر والوطن العربي لدرجة إن النجاح ده وصل لتركيا وتواصلوا معايا بكل احترام واخدوا مني اللحن بشكل رسمي واتترجم للتركي مع نجمة كبيرة بحجم ebru_yaşar ".

وتابع: "وحضرتك ممكن تتأكد بنفسك إن اسم الملحن "محمد احمد فؤاد" زي اسمي في التنازل وبتواصل دلوقتي معاهم عشان اسم الشهرة، وعايز أقول لحضرتك حاجة قبل ما تطلع في برنامج كبير زي ده لازم تتأكد من معلوماتك كويس، عشان انت كده مافرقتش عنهم حاجة هم سرقوا مجهودي وحضرتك بتضيعه وده شيء يؤسفني انه يخرج من أستاذ كبير زي حضرتك". 

وأكمل: "مش بس كده للأسف في حد اتهمني كمان إني سارقه من إسرائيل، دخلت لقيت انهم سارقين مني فعلا جزء من اللحن مش اللحن كله والتاريخ كان من بعد نجاح الأغنية بثلاث سنوات وده للتوضيح مش اكتر".