السؤال اللي أي بنت لازم تسمعه عشان هي بنت وده سبب كفاية أصلا. عايزة أسباب تاني؟ آه إنتي عديتي العشرين. آه وسهام بنت بنت خالتك اتجوزت وراوية بنت عمو محمود اللي في سابع اتخطبت. وبنت ابن خالة عمتك اطلقت واتجوزت تاني. وبنت عم عبده البواب اتكتب كتابها الجمعة اللي فاتت. اجيبلك مين تاني في الكوكب يقولك الجواز عليكِ حق؟
فيه كذا فرد وهيئة تشخيص وتفحيص وتفعيص متخصصين في طرح السؤال ده. أولهم أقرب ناس بتصحي عليهم. أبوكي وأمك.
هااااا حبيبة بابا؟
ايوة يا بابا. مش هتفرحي بابا بقي؟
لأ أنا مش عايزة الفرحة تدخل البيت.
End of text
نيجي لست الحبايب.
بنت خالتك سماح اتجوزت. إنتي مفيش حد عندك في شغل عينه منك؟ ماله ابن الجيران محمود واد زي القمر يادوب معدي الأربعين وشاريكي.
في الحالة دي لازم نشغل خاصية صوت "صرصور الحقل " بيبقي جمييل في الخلفية.
في الفرح تلاقي ناس ياخدوكي حضن مطارات وممكن تكون دي أول مره تشوفيهم. عدي من 1 ل 10 حتسمعي السؤال المركب: إنتي مخطوبة؟ طب متجوزة؟
في العزا. نفس الحضن. لأشخاص جديده بس من غير ألوان بقي. حبيبتي شدي حيلك. انتي بنت مين؟ اااه وجوزك هنا؟ غالبا حتردي إنك مش متجوزه. استني 5 ثواني بظبط: "ولا مخطوبة "؟
في الأسانسير ناس برضه متعرفهمش. حبيبتي إنتي بنت فلانة؟ سلميلي عليها اوي! ما شاء الله كبرتي وبقيتي عروسة. اتجوزتي حبيبتي؟ لأ … ايه الرجاله معندهمش نظر! تبقي تعالي عند طنط يا حبيبتي حستناكي نشرب قهوة …
أنا ممكن أفضل اقولك سيناريو سيناريو لحد ما نوصل لباب الحمام سوا.
ايه الرسايل اللي وصلتلك من كل مشهد من دول؟
حسيت إنك قريت الكلام ده قبل كده أو كل ده مألوف وعادي؟
المصيبة انه مش عادي. بس اتربينا انه عادي! وفيه ناس لسه حتربي جيل بأنه عادي. وأنا كنت من الجيل ده اللي اتربي على إن الجواز هدف من الأهداف الأولية اللي هي بتيجي كده مع ترتيبات الحياة اللي هي كالتالي:
اذاكر – ادرس -اتخرج- اشتغل - اتجوز – اخلف (وخانة التخرج والشغل لو عدت سنة ولسه متجوزتش ولا اتخطبت. يبقي أنا متأخرة وناقصة حاجة!).
ده مش كلام عشان اقولك إن اهم حاجة نبقي كده وإني سيلف اندبندت ومن ومش عايزة اتجوز. لأ بس ده مقال نفسي يوصل لكل أب وكل أم وكل طنط شايفين إن الجواز هدف. واللي اتأخر نصيبها " ياحرام حتعنس " كلمة عنوسة في حد ذاتها كلمة ملهاش أي معني! بس كل واحد بيفكر بالطريقة دي ساهم وحط للكلمة دي معنى.
نسب الطلاق كل يوم بتزيد.و فيه احصائية كمان بتؤكد إن النسبة دي في الفترة الاخيرة بنسبه 75% من الشباب اللي اتجوزوا من سن 22 – 26 يعني اللي لحقوا واللي قلنا عليهم يا ولاد اللعيبه اتجوزتوا بدري! وكنا فاكرين إن دول ناس انجزت وخلصوا مراحل حياة اللي على المسطرة.
أنا مش هروح لبعيد حتكلم بلسان تجربتي. أنا بنت عندي 28 سنة " مش هنفرح بيكي؟ " بتتقالي أكتر مابسمع صباح الخير في حياتي. لدرجه خلتني أحس إني سبب في بؤس نص الكوكب. بقالي 28 سنة حابسه الفرحة على أهلي وخلق الله!
انتوا متخيلين كام بنت زيي مضغوطة عشان فاكره وحاسه إنها مش عامله اللي عليها ومش بتفرح أهلها؟ أو حجم المعناه في كل مره تجهزي عشان تفرحي لصاحبتك في فرحها. فابوكي ولا امك يبصولك نظرة كلها يأس معجونة بحزن ارستقراطي تصحبها كلمة. "عقبالك يا حبيبتي".
ممكن يكونوا الأهل معذورين. من وهما صغيرين وصلهم مفهوم الفرحة غلط. فكان شيء طبيعي إن يوصلوا اللي وصلهم واتحفر جواهم من وهما صغيرين. بس كل مفهوم اصله فكرة والفكرة قابله لمناقشه صحتها أو لأ.
هل الجواز نهاية الحدوتة زي كل الأفلام العربي؟
قريت من كام يوم كتاب بيناقش فكرة العلاقات والجواز وكان فيه سؤال علم معايا اوي. السؤال ده برضه بوجهه لكل اب وام وطنط بيزقوا أي بنت إنها تتجوز أي حد والسلام. لحسن القطر يفوتها وتحمل لقب "عانس".
هو الزواج أصلا علاقة؟ هو الزواج في حد ذاته معناه نجاح العلاقة بين الأتنين؟ هو الزواج ضمان لاستمراريه الحب؟
ج: الحقيقة ان الزواج في حد ذاته مش علاقة اصلا. الزواج مجرد إطار لعمل العلاقة. يعني الزواج هو بس فرصة لعمل علاقة بين اتنين.
مينفعش الجواز يبقي هدفه جنس "محلل ". مينفعش يبقي ده الهدف منه بس!
العلاقة الجنسية عامل مهم وخطير في خطوة الجواز والحقيقة أحسن حد وصفه لحد دلوقتي هو ال د محمد طه وهو استشاري نفسي وكاتب. بيقولك ايه بقي؟
مبدئيا مهم انا نعرف أن الجنس حاجة. والعلاقة الجنسية حاجة تاني خالص.
الجنس هو فعل جسدي. ميكانيكي في معظمه. مش لازم يكون مرتبط بأي مشاعر أو التزامات نفسية أو معنوية بين الطرفين. يعني في ثقافات مختلفة عننا ممكن واحد يمارس الجنس مع واحدة ميعرفهاش. ممكن واحدة تمارس الجنس مع واحد مش حتشوفه تاني. أو بمقابل مادي. أو تحت ضغط أو الإكراه أو بالقوة أو الأغتصاب. كل ده اسمه جنس. وبس.
أما العلاقة الجنسية فهي علاقة بكل التفاصيل ومعاني الكلمة. يعني فيها مشاعر. وأفكار والتزامات أخلاقية. ونفسية. وجسدية وقبلها طبعا. في مجتمعنا وثقفاتنا دينية. الجنس هنا أداة لقرب وللتواصل والتعبير.
العلاقة جواها معاني وتفاصيل كتير اوي واحنا اتعودنا نختزله في الفعل وبدايته ونهايته. لأ الجنس لوحده مش علاقة. الجنس لغة. فقط .. وأداة لتوصيل المعني بين الطرفين …بينهم مودة ورحمة.
أنا كنت فاكرة أن سعادتي ناقصة خطوة الجواز. وإن مش هفرح اللي حواليا ومش هحس بأنوثتي كاملة ألا وفيه راجل جمبي متجوزاه. ايه اللي خلاني افتح عنيا وأشوف أني مش ناقصة وإني كاملة ومش محتاجه اللي يكملني؟ وايه اللي خلاني قادرة افرق من رغبتي الحقيقيه ورغبة اهلي ومعارفي وأصحابي؟
حاجة واحدة بس اللي وصلتني لده واللي حتوصل لكل واحدة تحت الضغط ده.
إنتي. انتي لوحدك من غير صندوق الناس والمجتمع. صندوق العادات والتقاليد.صندوق اللي لازم والمفروض.
هو قرار. قرار صعب ومحتاج شجاعة المخاطرة وكل حاجة تستاهل بيكون فيها مخاطرة.
الجواز مش هدف ولا نهاية. الجواز بداية حياة. عشان كده يوم ما تختاري ايوة تختاري مش يختاروا عشانك. لازم تبقي قد المسئولية دي عشان متكرريش فشل سيناريوهاتك القديمة أو سيناريوهات أبوكي وامك واهلك وقرايبك واصحابك ومعارفك. اكتبي سيناريو جديد بتاعك ولشريك حياتك بكامل وعيك وارادتك الحرة ومسئوليتك انتي.
ينفع تحبي حد وانتي مش بتحبي نفسك. جسمك؟ ينفع تحبي حد وانتي مش عارفة تركزي في ملامحه وهويته كشخص وكل تركيزك ايه الخطوة اللي جاية؟
لو حقدر أوصل رسالتي لكل بنت. حقولها قبل ما تفكري في جواز من الشخص اللي بتحبيه.
الجواز مش الحلم الوردي لأ. أنا عندي قائمة من بنات ورجالة كانوا فاكرين كده واتسرعوا في الخطوة دي وفاقوا على طلاق وعيال وهما معدوش سن ال 25 .. حبي نفسك. اقبليها بعيوبها وتقبليها عشان تقدري تعملي ده مع الطرف التاني.
فتحي عينك على عيوبه شوفي اوحش ما فيه وخليكي على طبيعتك من غير تمثيل. خليه هو كمان يشوف اوحش مافيكي. عشان الجواز حيكون الأختبار ليكي وله لكونك حقيقي أو مزيف. عشان متجيش في نص وتقولي مش لاعبة. أو مش لاعب.
الجواز هو قرار إنك شايفه الشخص اللي معاكي وعنيكي مفتحة مع الاعتراف أنك مش هتغيريه ولا حينفع تغيريه. حتقبليه وحيقبلك زي ما أنتِ. هو ده قمة الحب والأمان. تبقوا حقيقيين وتلاقوا اللي حابين روحكم من غير أي اضافات. الحب من غير شروط حب موجود.و هو ده الفطرة اللي ربنا خلقها جوانا. الجواز مش شرط. الجواز قرار ولما تقرر. أو لما تقرري ده. اقروا القسم ده مع بعض قريته من كتاب "علاقات خطرة" - لـ د.محمد طه:
"كلمتين عاوزكم تحفظوهم. وترددوهم. وتعتبروهم قسم وعهد قدام نفسكم وقدام ربنا لما تيجوا تتجوزوا. ممكن حتى تقولهم بعد الصيغة الرسمية للزواج مباشرة. الكلام ده لكل المقبلين على الزواج. ولكل المتجوزين اللي عاوزين يجددوا قرار جوازهم مع بعض.
قول ورايا (وإنتي قولي بصيغة المؤنث): "أشهد الله وأشهدكم. أني قابلك كلك على بعضك. قبول موقف. مايتغيرش بتغير أحوالك. قبول لحسابك مش لحسابي. قبول دون شروط … وأني مش هاخنقك ولا اطبقك ولا أعجزك ولا أختزلك. ولا أسمحلك تعملي معايا ده.. وأني مش هامارس معاكي في يوم من الأيام ولا هاسمحلك تمارسي معايا دور الضحية ولا دور الجاني ولا دور المنقذ. ولا غيرهم وإني أحترمك وأقدرك وأهتم بيكي. وأحبك وأسامحك وأعذرك وأديلك فرص وسماح وبرااااح.. وإني ماتشعبطش فيكي ولا أسمحلك تتشعبطي فيا. وانا نكبر وننضج ونتحمل المسئولية من خلال علاقتنا ببعض. وأني أقبل معاكي وأساعدك تقبلي معايا ضعفي وضعفك. وألمي وألمك وموتي وموتك. وأني أحيا معاكي بنفسي الحقيقية. وأساعدك تحيي معايا بنفسك الحقيقية. في وجود الناس وفي وجود ربنا. من غير ما نلغي أو نجنب أو نشوه علاقتنا بأي حد فيهم. وأني أفضل مصدق أني أستاهل. وأساعدك تفضلي مصدقة أنك تستاهلي. وأن حياتي معاكي تكون بداية جديدة في طريق النور. وخطوة جديدة في سكة الحقيقة".
آمين. آمين.
