آه يا مرارى
شاهيناز النجار
آه يا مرارى
كيف تصطاد مزة فى خمس خطوات
فى الأيام السودة إلى احنا عايشينها الناس مبقاش ليها تسلية غير الفيس واللاب( زى ما بنسمع اليومين دول) ،وطبعا والحمدلله دى انفراجة كبيرة اوى لرجالة بلدنا .
الراجل من دول بيبقى سايب مراته نايمة ولا بتأكل العيال وهو هايص بيعلق مزز من على الفيس بوك ومن هنا الراجل الشرقى الساحر ابتدع الخمس خطوات فى كيفية تعليق المزة من على الفيس (الله يحرقه).
الخطوة الاولى:-
الراجل من دول واللى ملوش تمنتاشر لازمة عامله بروفايل ولا جورج كلونى ضرب لنا صورتين وهو قالع القميص ومبين لنا الكرش والمصيبة الأكبر فى المايوه أبو قلوب ونجوم اللى بيفكرنى بيبرباطوس العيال قال يعنى واد cool
وطبعا لازم النضارة اللى الحمدلله مخبية نص وشه العكر اللى استلقطها بخمسة جنية من قدام محطة اسباتس ، وطبعا والأهم الجل السحرى اللى علشان يطلع من أم شعره محتاج عشرين يوم وطبعا المز لازم برضه يحط لنا صورتين وهو بيشيل كام كوز على كام ماسورة فى الجيم اللى تحت سلم بيتهم .
بعدين يبدأ يحط عينه على المزز اللى فى الفيس .
ونبدأ الخطوة التانية:-
(طبعا الفريسة لازم يكون معظم أصحابها ستات ،البوستات تدل على البؤس وشوية تحابيش تانية) يقوم صاحبنا باعت طلب صداقة تقوم الست الذوق تقبل (نفسها برضه البروفايل يبقى عدد الرجالة فيه الله أكبر ولا معجبين إليسا).
وتبدأ الخطوة التالتة:
هو : شكرا لقبولك الصداقة
هى: العفو
هو : يا ريت أبقى صديق قريب ليكى وتبقى صداقة مثمرة
هى: إن شاء الله
الخطوة الرابعة :
هو : نفسى أعرفك أكتر وعندى إحساس غريب إنك وحيدة
هى: لا تعليق
الخطوة الخامسة :
يبدأ الزبون يشير (sharing) فيديوهات تقل دم إيه وسماجة إيه قال يعنى الواد بيحاول يملى حياتها وشوية مسجات طمنينى عليكى، صباح الخير-هو أنت أصلا تعرفها يا بعيد طبعا الست بتطنش ساعات وساعات بترد يعنى علشان ذوق (وطبعا لازم فى النص يبوكها) يعنى pokes .
نمرة موبايله على الاينبوكس مع السؤال الشهير والأخير "مش كفاية بقى كلام على الفيس " (الله يحرقك أنت والفيس فى يوم واحد – آمين) نفسى أشوفك
صاحبتنا بتحس بفطرتها بسرعة إنه كمين فتقوم عاملة بلوك ومن هنا تبدأ النهاية
المز يعرف إن الموضوع فكس يبدأ ينزلها صور (طبعا واخدهم من على البروفايل) شتيمة إيه وكلام جارح إيه والست يا ولداه تتفضح فضيحة اللحمة فى السوق .
على فكرة الموقف ده حصل لواحدة صاحبتى .
يا ريتك يا مز تكون بتعرف تقرأ أو حتى تفك الخط أو تفهم إن الفيس (على رأيك )مش لتعليق الحريم ده له أغراض تانية خالص محتاج تفهمها وطبعا عمرك ما حتفهمها.
لكن حقول إيه ؟!! أهو ده اللى خدناه من الفيس واللاب وسنينهم .
آه يا مرارى .
د/ شين
