اتهم المدون والناشط السياسي وائل عباس، شركة فودافون، بالسماح للحكومة، باختراق حساباته الشخصية على مواقع التواصل الاجتماعي "فيس بوك ـ جيميل ـ هوتمييل ـ ياهو".
وقال في تدوينة على حسابه بموقع التواصل الاجتماعي "فيس بوك": "امبارح كنت في السينما بتفرج على فيلم نوارة وما كملتهوش للآخر، في نص الفيلم في الاستراحة لقيت رسالة على موبايلي: ده كود تغيير الباسوورد بتاعك لفيس بوك طنشت لأن ده بيحصل كتير ناس كتير تحاول اختراق الحساب بس ها يعرفوا ازاي والكود بييجي للموبايل".
وأضاف: "المهم المرة دي جاتلي رسالة تم تغيير الباسوورد بنجاح، يعني حد نجح يخترق فيسبوكي فعلًا المرة دي، وعن طريق كود الدخول اللي اتبعت لي على تليفوني، اللي مفروض مافيش حد بيطلع عليه غيري أنا وشركة فودافون، المفروض أن ده مستوى عالي من الحماية والخصوصية أنا عامله مخصوص ضد الاختراق".
وأكمل: "ده ما بيخليش أي مجال للشك أن فودافون سمحت لجهة ما بأنها تشوف رسائلي النصية وتاخد الكود وتخش بيه، اتكرر ده مع إيميلي على ياهو وعلى جيميل وعلى هوتميل كمان، خرجت من السينما جري روحت عند واحد صاحبي أشوف إيه اللي بيحصل، قعدت عنده لحد الساعة 9 بالليل ونجحت أرجع الفيس بوك والجيميل والهوتميل، لسه باتواصل مع أعلى مستوى في خدمة عملاء ياهو لأن الاكاونت لسه فيه مشاكل".
وواصل: "خدمة عملاء فودافون اتصلوا بيا مرتين علشان يبرروا موقفهم وينفوا تورطهم، اديتلهم رقم التليفون اللي عمل الاختراق، وهو بالمناسبة رقم فودافون قالولي ما نقدرش نطلعك على أي معلومات وما استفدتش منهم باي حاجة طبعًا، أنا معايا رقمين تليفون لمن حاولوا الاختراق، ورقم اي بي وايميل ولوكيشان وبيانات أخرى، وتاكيدات من جوجل أن محاولة الاختراق من جانب الحكومة المصرية".
وتابع: "طبعًا فيه ناس كتير زياطة وتقولك اشمعنى أنت وهم ها يعملوا فيك كده ليه، ودول نحطهم جنب اخواتهم السفلة اللي بيقولولي اشمعنى أنت ما اتقبضش عليك وسايبينك،عمومًا أنا شخصيًا مش عارف إيه وجه خطورتي عالنظام بجد وخطورة حساباتي عالإنترنت".
وأردف: "لكن أعتقد بعض الأخبار والتسريبات اللي نشرتها وبانشرها مخلياهم ربما عاوزين يعرفوا مين مصادري يمكن خصوصًا إني نشرت عن التعديل الوزاري قبلها بأسبوعين، ونشرت عن قضية المجتمع المدني قبل ما تظهر للنور وقلت أن جمعيات حقوق الانسان بيتحضرلها قضية تمويل، وحذرت من منع نشطاء من السفر ومن التحفظ على أموالهم تحديدًا، ربما هذا هو السبب الحقيقة لا اعرف، النكتة أن الهاكرز قلبوا الفيس بوك بتاعي عربي وأنا عامله انجليزي، صحيح 50%".
اقرأ أيضًا:
وائل عباس: عاطف بطرس أول حالة نفي خارج مصر وائل عباس : ابن تيمية أصل الإرهاب وائل عباس: إسرائيل الدولة الوحيدة التي لا تقلق من "داعش" وائل عباس يدعو لشن حملة ضد التصفية الجسدية خارج القانون وائل عباس يعلن وفاة الكاتب براء أشرف