مين طفا النور؟
الضلمة مهياش نور مقطوع
تلاجة ومكوى وتلفزيون
الضلمة دي ظلم وقهر وجوع
ناس واقفة تبيع على ناس بتخون
الظلم ظلام
والضلمة دي غش
ووعود وكلام
ما بيتنفذش
ومعارضة فشوش ودقون عيرة
وفساد ممنوع ييجي ف سيرة
وشباب مسجون من غير أوراق
وشيوخ المنصر ف بيوتها
وأمل كداب بيبيع ترياق
فقرا بتتصدق من قوتها
وكلام معسول .. رغي وتلزيق
إعلام طباخ .. هرى وتزويق
مش وقت كلام
ولا قولة "أي"
خليك قمور
دورك أهو جاي
وحزام مشدود
على عود مهدود
أديك إزاي من لحم الحي؟
ممنوع.
محظور.
بعدين.
بالدور.
مش في الدستور
ولا في القرآن
ولا في الإنجيل
ولا أي قانون
طلع الموضوع مش نور مقطوع
مش مكوى ودش وتلفزيون
تخفيف أحمال
تخفيف أحمال
تخفيف أحمال
نظرا للضغط وسوء الحال
وأنتم شايفين مش عاوزة سؤال!
زاد الاستهلاك
وده مش مطلوب
والناس بتزيد
مواردنا يا دوب
فماتسألوناش
ما هو كده يا بلاش
وده بعد الصبر وطولة البال
تخفيف أحمال
ح نخفّ النور ف عيون أطفال
عشمانة ف أيامها الجاية
وشباب ح يموت وبلاده ف يوم
تتنفس نسمة حرية
بنوتة بتحلم بالزفة
وعيال عيانة وعايزة تعيش
وعجوز مكسور لمعت عينه
لما اتحرك به طابور العيش
والنور اللي ف صفحة كتاب
وإضاءة الكاميرات كمان
واللمبة فوق راس السجين
أو رسمة بتنوّر حيطان
ح نطفّي النور
عند الملايين
إجراء مطلوب
وانتم فاهمين
ما هو مش معقول ح نسيب النور
يفضل شغال .. قايد علطول
والسحب يزيد
من غير ترشيد
طب يبقى حرام ده ولا حلال؟!
تخفيف أحمال
اقرأ أيضًا:
