أصبح الفنان محمد صبحي يشارك  العديد من المواقف والذكريات التي جمعته بكبار النجوم، مع جمهوره  عبر صفحته الرسمية.

وحكى صبحي عن موقف لا ينساه جمعه بالفنان الراحل محمود المليجي، وقال :"موقف لا يمكن انساه في كواليس مسرحية " انتهي الدرس يا غبي " كنت وقتها عايز أضيف جملة أو أضيف إفيه يضحك بس كنت محرج جداً من أستاذ محمود المليجي إني ازود في كلامي وهو موجود فكنت بسكت".

وتابع :"مرة دخل الأوضة عندي وقالي بعنف وبطريقته المعروفة .. انت بتكون عايز تقول حاجات وبتسكت ليه ! كاتم اللي جوّاك ليه يا ابني احنا ماشيين احنا دلوقتي موجودين عشانكم انت اللي لازم تطلع قول اللي في نفسك ... بكيت وقتها وحضنته لا يمكن انكر اننا نتاج هذا الجيل العظيم". 

وسرد صبحي موقف آخر جمعه بالفنانة زوزو نبيل، وكتب :"موقف حصل بيني وبين الفنانة القديرة زوزو نبيل أثناء تصوير مسلسل رحلة المليون ١٩٨٤ .. كنت قبلها مقدم شخصية علي بيه مظهر اللي حققت نجاح كبير جداً وكنت خايف الجمهور مايعرفش يشوفني غير " علي بيه مظهر "".

وتابع :"وفِي يوم من ايّام تصوير سنبل اللي كنّا لغاية أوائل رمضان مستمرين في تصويره .. وقت الفطار كنت في الشارع بفطر وراجع تاني التصوير كان فيه قهوة مشغلة سنبل والنَّاس بتتفرج جه مشهد كوميدي لاقيت القهوة كلها ضحكت بصوت عالي "

وأضاف :"جريت من فرحتي علي الاستديو وبقول لحبيبتي زوزو نبيل بفرحة كبيرة وقولت  قتلته يا ماما زوزو..اتخضت وقالتلي مين ده ؟!..قلتها قتلت علي بيه مظهر..وكان من احلي أيام حياتي لما لمست نجاح سنبل ".

 يذكر أن محمد صبحي يستعد  لتقديم مسرحيته  الجديدة "عيلة اتعملها بلوك" على مسرحه بمدينة سنبل،ومن المقرر أن تكون  نوفمبر، وهي من تأليف مصطفى شهيب ومن إخراج محمد صبحي ومن بطولة فرقة استوديو الممثل.

 المسرحية تأخذنا إلى عام 2130 لنشاهد شخصًا في رحلة بحث عن أصوله تعود به إلى الوراء في الزمن، إلى عام 1930، لنتعرف على التغيرات التي طرأت خلال 200 عام على شكل الأسرة، والجيران، وإيقاع الحياة، وأيضًا على الحالة السياسية والاقتصادية والسلوكية، وحتى الألفاظ المستخدمة، وكيف تعرضت عائلة جميلة لـ"بلوك" في أحد العصور.