قرأت مقالا من فترة لكاتبه مصرية بعنوان "إوعى تتجوزى مصرى" تحذر فيه البنات من الزواج من رجل مصرى أو لمجرد التفكير فيه لأسباب كثيرة أهمها على حسب قولها:

أن الرجل المصرى كل تفكيره فى الأكل وبس
 يحطم إرادتك دائما
 رجل مش رياضى
رجل شايف الكرش عزوة
مش فاهم احتياجات البنت ولا ظروفها
ماتعلمش يعنى إيه مسؤولية
مفاهيم الزواج والارتباط عنده غير موجودة

وبعد أن قرأت المقال سألت نفسى كمعظم القراء سؤالا بديهيا "وهل العيب فى الرجل المصرى فقط.. وماذا عن البنت المصرية؟ فهل صنعت لها أجنحة وأصبحت ملاكا يحلق فوق رؤوس الرجال لأنها أفضل منهم بكثير .

الزواج الفاشل فى تعريف الخبراء الاجتماعيين هو نتيجة مشتركة من الطرفين الرجل والمرأة على السواء .. وإن لم تتزوج البنت المصرية من رجل مصرى فما هو الرجل المناسب إذن الذى يتحمل طلبات ومفاهيم البنت المصرية  للزواج؟

إوعى تتجوز مصرية

وردًّا على مقال إوعى تتجوزى مصرى.. أقول للشاب الآخر "اللى هو غير مصرى اللى البنت هتختاره للزواج عشان المصرى وحش.. إوعى تتجوز مصرية" للأسباب الآتية:

1- بنت كل تفكيرها عن الزواج "إزاى تجمع أكبر عدد من الكاسات عشان تشيلها فى النيش اللى هو مابيتفتحش أصلا غير للتصوير فقط  أى ممنوع اللمس والاقتراب حتى لأفراد البيت".

2- إوعى تتجوز بنت كل همها بتقبض كام عشان تعيشها فى نفس المستوى "اللى كان باباى وماماى معيشنها فيه قبل الزواج".

3- كل مفهومها عن الخطوبة إن خطيبها يكتبلها على البروفايل بتاعها "ماقدرش أعيش من غيرك يابيبى..بحبك" عشان صاحباتها يحسدنها على الحب اللى غرقانة فيه.

4- بنت كل مفهومها عن الحمل "الأكل الكتير ومتفهموهاش غلط دى بتاكل لنفسها وللبيبى لحد ماتتحول لكائن مربع ومرعب بعد الولادة".

5- إوعى تتجوز واحدة واخدة فكرة عن مامتك إنها البعبع اللى لازم تنتصر عليه بعد الزواج "اللى هى حماتها حضرتك".

6- بنت كل طموحها فى رمضان إنها تتفرج على كل المسلسلات المعروضة على القنوات الفضائية وإلا ماتحسش برمضان.

7- ماتفكرش تتجوز بنت كل طموحها إنها تختار عريس استيل وشبه جورج كلونى يحسدها عليه كل صاحباتها قبل ماهى تكون مقتنعة أصلا بأخلاقه وتربيته.

8- وأخيرا إوعى تتجوز مصرية اللى ممكن تفشكل الجوازة كلها عشان حضرتك مارضتش تجبلها الفوتوغرافر المشهور يصورها فى ليلة فرحها وبنت عمها اللى جابته مش أحسن منها.

الخلاصة

مافيش حاجة اسمها "إوعى تتجوزى مصرى.. وإوعى تتجوز مصرية" زى مافى بنات ناقصات عقل فى تفكيرها فى كل حاجة بجد.. فيه رجالة ناقصين تحمل مسؤولية وتفكير من الأصل .

زى مافى رجالة كل طموحها إنها هاتاكل إيه على الغدا فى بنات كل همها إنها تلبس طقم إيه وهى خارجة عشان تبقى شيك .

يعنى مافيش راجل مصرى لا يصلح للزواج  ومافيش بنت مصرية فوق شبهات الأخطاء، لكن فى حاجة اسمها دى أو ده فى مميزات كذا وعيوب كذا.. وإنت أو إنتى اللى تقدرى توزني إحتياجاتك فى الشخص المطلوب للزواج..وإنت اللى تقدر تحدد أهدافك فى شريكة عمرك ..ومن هنا نضع أولويات شريك الحياة فى حياتنا الأسرية والاجتماعية.. الزواج مشاركة.. تحمل الآخر.. تقدير .. مساعدة.. تفاهم.. حوار.. ليصبح الزواج زواجا ناجحا مستقرا يشوبه السخرية والفشل.