إمبارح أنجزتى المهمة التالتة فى حملة التنضيف قبل العيد وهى تنضيف غرفة الأطفال لأنها دايما بتبقى مكركبة وبتحتاج مجهود كبير ووقت. والنهاردة بإذن الله برضه هاننجز جزء مهم من حملة التنضيف قبل العيد وهى غرفة النوم الكبيرة بطريقة سهلة وسريعة..
1- زى ماتعودنا فى الأيام اللى فاتت قبل عملية الإقتحام لتنضيف أى جزء فى الشقة بننجز اللى ورانا الأول سريعا عشان نركز فى اللى إحنا بنعمله بعد كده وماتقعوديش داخلة خارجة ويتشتت مجهودك بين كذا حاجة
2- بعد كده ادخلى الأوضة وإفتحى الشبابيك عشان الشمس تدخل وتغير هواها وتشمس كل الأوضة
3- زعفى الأوضة كويس من التراب ونفضى الشبابيك وحطى كرسى ونفضى فوفق الدولاب بقطعة قماش قديمة عندك
4- اكنسى الأوضة كلها الأول عشان تتنضف من التراب قبل ماتنزلى أى حاجة
5- نادى حد من البيت يساعدك وشيلى مرتبة السرير فى البلكونة لو هى قريبه من الأوضة او حطيها قدام الشباك تتشمس لحد ماتخلصى تنضيف السرير
6- امسحى تحت السرير بميه ومعطر للمسيح ونشفيه كويس قبل ماتحطى المرتبة تانى
7- هاتى قطعة قماش مبلله بصابون وقطرات من الخل وامسحى خشب السرير بيها وبعدين لمعيها بملمع الأخشاب .
8- حطى المرتبة تانى وبكده تكونى خلصتى من تنضيف السرير
9- ادخلى بقى على الدولاب وامسحيه كويس من بره بملمع الخشب وشيلى رف رف من الهدوم وامسحى تحته وغيرى فرشه ورصى الهدوم تانى
10- نزلى كل الحاجة اللى على التسريحة وامسحيها كويس بملمع الأخشاب الأول وبعدين المراية بملمع الزجاج ورتبى حاجتك تانى واتخصلى من الحاجات اللى مابتستعملهاش وعاملة زحمة على التسريحة
11- لمى كل الهدوم اللى مش نضيفة وحطيها فى الغسالة وشغليها على طول للغسيل وطبقى الهدوم النضيفة ورصيها فى الدولاب
12- اعملى فى الكومودينات زى ماعملتى فى الدولاب والتسريحة
13- امسحى الأرض بميه ومطهر وسيبيها تنشف براحتها
14- افرشى السجاد وعلقى الستاير النضيفة
15- واخيرا غيرى جو الأوضة شوية بمناسبة العيد وزينيها بالورد المجفف والشموع المعطرة .
اقرأ أيضًا:
