زى كل سنة فى الوقت ده وقبل العيد بأسبوع.. بنلاقى كل ست مصرية أصيلة بتموت فى النضافة وهدة الحيل تدخل المطبخ وتعمل كوباية الشاى بلبن قال إيه هاتقعد برواقة وتفكر كده هاتبتدى التنضيف منين.
وتلاقى نفسك بعد ما تكتبى خطتك وتبدعى فى تصوراتك التنضيفية محتاسة ومحتارة ومش عارفة برضه تبتدى منين ولا تعملى إيه.. وتقعدى على الحيرة دى لحد مايطب يوم الوقفة عليكى وإنتى لسه واقفة فى مكانك وبتقولى ياهادى..
وتنشغلى بتنضيف البيت طول اليوم لحد صلاة العيد .اللى يعالم بتقدرى تروحى تصليها ولا لأ من كتر التعب والإرهاق وسعات أصلا بتكونى لسه بتفنشى..عشان كده قررنا السنادى إننا نفكر مع بعض ونرتب معاكى الدنيا وهانقدملك خطوات سهلة تابعيها معانا أول بأول وهاتلاقى نفسك خلصتى الشقة قبل يوم الوقفة بدون تعب ولا إرهاق ولا زحمة ولا نرفزة وتوتر..
أولا : سيبك بقى من القاعدة التنضيفية اللى بتقول "إمسكى أوضة أوضة وخلصيها كلها وادخلى على الأوضة اللى بعدها "لأن القاعدة دى أثبتت فشلها ومدى التعب والإرهاق اللى بتكونى فيه بعدها ..
ثانيا : فى أول يوم تنضيف حاولى إنك تكونى مجهزه الأكل قبلها وشيلاه فى الثلاجة أو الفريزر ويبقى على التسخين فقط..عشان ماتلخميش نفسك بين التنضيف وتحضير الأكل والمطبخ
ثالثا: قبل حملة التنضيف إغسلى كل الغسيل اللى فى الغسالة واخصلى منه عشان تفضى مكان لغسيل الستاير والفرش والملايات وماتحسيش إن الدنيا كلها فى لحظة بقت كوم غسيل
رابعا :كده الدنيا عندك هاتكون جاهزة لأول يوم تنضيف و إبدأى أول حاجة بلم ستاير الشقة كلها وحطيها فى الغسالة على مرتين او على حسب ستايرك وانشريها عشان لماتخلصى تنضيف تبقى جاهزة إنك تعلقيها تانى.
خامسا : نضفى شبابيك البلكونة الأول من التراب واغسليها بعد كده بمية وأى مسحوق بتستعمليه وزعفى البلكونة كويس عشان تبقى نضيفة إنك تشمسى فيها السجاد والمراتب والمخدات.
سادسا : بعد تنضيف البلكونة لمى السجاد والمراتب والمخدات وطلعيهم من أول النهار عشان يتنضفوا ويتشمسوا فى البلكونة
سادسا : وبكده الحاجات اللى عايزة تتغسل هاتغسليها واللى عايزة تتشمس او تتنفض هاتنضفيها للشقة كلها ..خدى راحة شوية وقومى تانى بعدها بس انشرى الفرش والستاير ودخلى الحاجة من البلكونة
وده هايبقى أول يوم تنضيف بخطوات سهلة ومنظمة وبسيطة وهاتلاقى الدنيا معاكى مترتبة ومش متكركبة يلا قومى وماتكسليش ونضفى شقتك معانا وبكرة هانقولك هانكمل الحملة التنضيفية للشقة قبل العيد إزاى..
اقرأ أيضًا:
