حرص عدد من النجوم على دعم المطرب والملحن رامي جمال، الذي اعلن عن مرضه بالبهاق، و كشف معاناته بسبب هذا المرض، وتفكيره في اعتزال الفن.

 المطربة اللبنانية، اليسا علقت على مرض رامي قائلة "ممنوع تغيب وممنوع يكون البهاق عذر لغيابك.. إنت بتقول ابتليت بالبهاق، بس مش سبب لتخاف وتغيب.. في ناس ابتلت بالكذب والخيانة والسرقة وما هزت. .وجودك أساسي ومتل ما إنت بتقول: أصل الحكاية مش حماية "شكل"... حكاية روح".

أما الفنان تامر حسني كتب "إلى  الفنان الكبير و الصديق الحقيقي و المحترم رامي جمال يا حبيبي أنت فنان كبير و محبوب و ليك قيمتك و كل الناس بتحبك و مفيش حاجه هتعطلك عن نجاحك ، و تعبك دا لاهو مؤذي ولا مُعدي و كل الناس جواها تعب في منه اللي ظاهر و في منه اللي مش ظاهر حتى لو كان تعب نفسي أو مادي كل شخص جواه وجع من حاجه معينه المهم أننا نبص و نتعلم من اللي ظروفهم أصعب مننا و رغم كدا عندهم صبر و بينجحوا في الإختبار و بيقولوا الحمدلله و مكملين و عندهم إراده و بينجحوا أكتر من الأول لازم تكمل نجاح يا رامي ".

وتابع تامر: " شيل أي هلاوس من دماغك و إوعى تخبي نفسك اللي بيحبك بيحبك لشخصك و فنك صدقني دي حاجه عاديه يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين أزاي و نفسهم يفرحوك و بعدين إفتكر إن مايكل چاكسون جاله نفس اللي جالك و بقى أسطوره مبتتكررش خااااالص وانت فنان و عارف ...أنا واثق إنك مؤمن و بتحمد ربنا و هتقوم و هتكمل و هفكرك قدام كل الناس اللي شايفه كلامي إنك هتنجح أكتر و أكتر و ربنا هيكرمك أجمل كرم و هتشوف قريب ".

وكتب المطرب أحمد جمال قائلا "سلامتك يا رامي يا حبيبي أولاً ربنا ما بيختارش غير الخير و تأكد ان كل اللي بيحصلنا في الدنيا من تدبير ربنا و رحمته بينا ثانياً جمهورك اللي بيحبك هيفضل يحبك و مكمل معاك بأي شكل و ف أي وقت".

ووجهت الفنانة راندا البحيري رساله له جاء فيها "الحمدلله علي كل شئ.. أنا بحبك أوي يا رامي و إنت أكيد عارف ده. ربنا يقدرك علي اللي هتشوفه أكيد من المجتمع.. بس أنا عن نفسي بنصحك... .و خليك مع القريبين. و إنجح. و إشتغل أكتر من الأول كمان. بحبك جدا ".

وتفاعلت الفنانة زينة مع خبر إصابة رامي جمال بالبهاق وكتبت"إنسان محترم ربنا يعفوا عنك ...للاسف احنا في دنيا مابترحمش والنَّاس بقت صعبه ياريت نحاول يكون في قلوبنا رحمة".

وتابعت "انت انسان موهوب يمكن أنا ماتشرفتش بمعرفتك بس قلبي معاك واوعي تفكر تتهزم ده مرض عادي وربنا يعفوا عنك وقول الحمد لله والنَّاس الرحيمة كتير واعتبرني من اهلك والإنسان بموهبته واحترامه وأخلاقه وبس".