ندد الإعلامي يسري فودة، بقرار البرلمان بالموافقة على اتفاقية ترسيم الحدود البحرية بين مصر والسعودية، والتي تنتقل بموجبها جزيرتي تيران وصنافير إلى المملكة.
وقال في تدوينة عبر حسابه على موقع التواصل الاجتماعي "فيس بوك": "إلى عبد الفتاح السيسي، تحية كاريوكا وبعد، (معقول يسري فوده يستخدم لغة زي دي؟) معلش بقى ما أنت قلبت كل حاجة في مصر مسخرة".
وتابع: "من يوم ما شخطت فينا وقلت "برنامج انتخابي إيه؟" إلى يوم ما وقفت وسط القضاة في جنازة النائب العام تشخط فيهم وتبهدلهم عشان يلاقولك حل، إلى يوم ما خليت عبد العال بتاعك يقول إن أحكام القضاء هي والعدم سواء".
وأضاف: "شكرتك لما اتحركت لإنقاذي كمواطن مصري بعد حادث طريق، وكنت عارف إنك هترفض طلبي بدفع فاتورة الطيارة اللي نقلتني عشان يستفيد منها ناس تانية واضح أنها ماتهمكش، اتبرعت بالمبلغ للغلابة عشان أريح ضميري، والأهم من كدة عشان الرسالة توصلك واضحة، أهديتك وقتها في المقابل حاجتين: مجلد مجموعة تحقيقات "سري للغاية"، وقطعة جلدية ناشفة من بيادة عسكري مصري من ضحايا 67 مخلوط فيها آثار الدم بالعرق بالرمل، تقدر تحتفظ بالمجلد، الحاجة التانية دي أنا عايزها بعد إذنك، ما تزعلش مني: أنت لا تستحقها".
وواصل: "احنا عارفين وانت عارف إنك حرقت وراك كل المراكب من زمان، وإنك مالكش خط رجعة، عارفين كلنا، وفاهمين تصرفاتك على هذا الأساس، المشكلة إننا عارفين إن انت عارف إن مفيش للطريق ده غير نهاية واحدة محفوظة، فيلم ممل شوية، بس رعب الاحتمالات المتاحة هيموتك كل يوم 20 مرة، كل ما هو عبد العال يليق بك".
.PNG)
ووافقت اللجنة التشريعية بمجلس النواب، أمس الثلاثاء، على اتفاقية ترسيم الحدود البحرية بين مصر والسعودية، بأغلبية 35 عضوًا من أعضاء اللجنة، مقابل رفض 8 أعضاء.
كذلك وافقت اللجنة على إحالة الاتفاقية للجلسة العامة، وفقا لحكم المادة 151 من الدستور، بعد التحقق من عدم وجود مخالفة دستورية، تمهيدًا لإحالتها للجنة المختصة.
