أعرب الإعلامي الإعلامي تامر أبو عرب، عن حزنه، وذلك بالتزامن مع مناقشة مجلس النواب لاتفاقية ترسيم الحدود اليوم الأحد.
وكتب عبر صفحته الشخصية بموقع التواصل الاجتماعي «فيس بوك»: «إحنا مقصّرناش..يمكن دي القضية الوحيدة من يناير ٢٠١١١ اللي مفيش حاجة نقدر نقول إنها كانت ممكن تتعمل ومعملنهاش».
وقال: «تظاهر ونزلنا الشوارع بالآلاف مرة واتنين واتدفع تمن ده حبس لشباب زي الورد لسة بعضهم في المحاكم والباقيين خرجوا بغرامات وكفالات بالملايين اتجمعت من الناس نفسهم».
وأضاف: « معركة قانونية ودخلنا رغم كل اليأس والإحباط والشك في منظومة العدالة وخدنا حكم النظام طعن عليه فكملنا بمحامين جدعان خدوا حكم نهائي مفروض كان يقفل الموضوع للأبد».
وأردف: «ناس سابت شغلها وحياتها وفضلت تجري من المكتبة دي للهيئة دي جوة وبرة مصر لحد ما وصلوا لعشرات الوثائق اللي بتثبت ملكية مصر للجزر وبعضها كمان كان من مراجع سعودية».
وتابع: «حملات على السوشيال ميديا وعملنا وبقى هاشتاج #تيران_وصنافير_مصرية براند عالمي رغم إن الحملات دي برضه تسببت في حبس ناس وقطع عيش ناس وكله دفع التمن ده بنفس راضية».
واستكمل: « مقالات وكتبنا بالمئات كلام مع الناس في الشارع ومع أهالينا واتكلمنا وكشفنا باعترافات المسؤولين نفسهم إن الجزر رايحة إسرائيل مش السعودية وحتى مناشدة المسؤولين والنواب وعملناها رغم إننا عارفين كويس إنهم لا مسؤولين ولا نواب وانهم بينفذوا قرار اتاخد فوق».
واستطرد: «أنا معنديش إحساس بالتقصير بس عندي إحساس بالقهر والعجز والضآلة قدام نفسي وقدام عيالي اللي هيحاسبوني بكرة إني كنت موجود في الأيام السودة دي، أيوة معنديش إحساس بالتقصير بس ده مش هيغير حاجة ومش هيمنع تسليم الأرض، زي بالضبط الناس اللي بتراهن على حل البرلمان لو سلم الجزيرتين بالدعوى اللي رفعها خالد علي، وزي الناس اللي بتراهن إن تسليم الجزر معناه بدء العد التنازلي لنهاية حكم السيسي كل ده كله مش فارق ومش هيغير حاجة في النتيجة حتى لو مقصرناش فاحنا اتهزمنا #تيران_وصنافير_مصرية».
ومن المقرر أن تبدأ اللجنة التشريعية بمجلس النواب، اليوم الأحد، جلسات استماع بشأن اتفاقية ترسيم الحدود البحرية بين مصر والسعودية، والتي بمقتضاها تتنازل مصر عن جزيرتي تيران وصنافير لصالح المملكة.
