انتقد المطرب محمد عطية كم "الأفورة" حول حفل افتتاح مشروع قناة السويس الجديدة – على حد وصفه.
وقال في تدوينة عبر حسابه على موقع التواصل الاجتماعي "فيس بوك": "بصراحة كم الأفورة اللى حاصلة شئ يخلي الواحد يطلع من هدومه، هي مبدئيًا مش قناة جديدة هي تفريعة زي تفريعات موجودة قبل كده وفي تفريعات أكبر منها".
وتابع: "ويا سيدي أنا هفترض معاك إنهم ١٠ قنوات جديدة هيدخلوا ٥٢٦٥١٧٦٤٥٠٨٧٤٦٩٩٧٣٢٧ مليار دولار في اليوم .. كده بقي مصر بتفرح؟ علي أساس إنك كمواطن عادي مستفيد من دخل قناة السويس الأساسية؟ أو مستفيد من أي مشروع قومي أو عارف فلوسهم بتروح فين؟".
وأضاف: "ده إحنا لمينا فلوس السنة اللي فاتت دي بالكوم ولا حد يعرف عنها حاجة ولا حد بيحاسب حد، باشا .. الناس مش لاقية تاكل و الدولار وصل لأعلي سعر ليه والتعليم والصحة زفت والبطالة في تزايد رهيب و الأمن حالته يرثى لها".
وذكر: "طب بلاش .. المعتقلين يا باشا؟ الحرية اللي هى أهم من الأكل والشرب؟ صدقني الحرية اللي انت بتزيط عشان تمنعها دي ممكن في يوم تيجي تنادي بيها لابنك أو بنتك متلاقيهاش، ماهو انت محتاج بس توسع أفقك شوية وتبص كده معايا هتلاقي الإخوان والثوار والفلول في كل الطبقات يعني ما إنتش ضامن فكر إبنك أو بنتك".
وأردف: "والحل الوحيد إنك تحارب عشان تاخد وتضمن الحرية المطلقة زي البلاد المحترمة، طب التعذيب في السجون؟ طب حق الشهدا؟ طب الغلابة؟ طب أي حاجة طاه، مصر هتفرح سيادتك لما يكون فيها عدل وحرية وكرامة واحترام لآدميتك مش بمرحلة شعارات ستيناتي زي اللي احنا فيها دي".
وواصل: "اللي مش عارف إزاي هي واكلة مع الناس الصراحة .. البوست ده أنا عاوزكوا يا تفكروني بيه كمان سنة يا إما أنا هفكركوا بيه... هنشوف حال البلد بقي فين بعد التفريعة الجديدة .. يا رب يطلع كلامي غلط".
ومن المقرر أن يتم افتتاح قناة السويس الجديدة يوم الخميس القادم الموافق السادس من أغسطس الجاري كما تم دعوة العديد من رؤساء العالم للمشاركة في الافتتاح.
اقرأ أيضًا:
