رئيس التحرير: عادل صبري 01:44 صباحاً | الأحد 05 أبريل 2020 م | 11 شعبان 1441 هـ | الـقـاهـره °

الطفل أكرم.. حكاية سجين قطع الطريق الدائري "وهو نايم"

وفق رسالة من والده..

الطفل أكرم.. حكاية سجين قطع الطريق الدائري "وهو نايم"

أحمد علاء 25 ديسمبر 2014 12:27

نشر مركز النديم لتأهيل ضحايا العنف والتعذيب، رسالة محمد إبراهيم الصاوي، محامٍ، والد "أكرم"، 14 سنةً، محتجز في معكسر أمني بمدينة بنها بمحافظة القليوبية، ألقي القبض عليه قبل عيد الأضحى المبارك بأيام قليلة، بتهمة قطع الطريق الدائري.

 

ونصت الرسالة، المنشورة على صفحة المركز على موقع التواصل الاجتماعي "فيس بوك": "يوم الأحد اللي قبل العيد حوالي الساعة اتنين ونصف الفجر، سمعت أصوات عالية كأنه زلزال، تكسير ورجلين كثير على السلم، فتحت الباب لقيت قوات خاصة بيفتحوا الشقة اللي تحتي، أول ما فتحت الباب جريوا على شقتي فى الدور السادس، أكثر من 20 ضابط وعسكري كانوا جوا الشقه، اللي على السلم واللي في الشارع مالهمش عدد، هجموا على شقتي تكسير وقلبوا كل حته في البيت".

 

وأضافت: "أخدوا ابني وعشرة آلاف جنيه من البيت ودبلة مراتي من تحت مخدتها، وتليفونات وبطايق ومسكوا أوراق تخصني وكتب وقالوا إنت كمان تيجي معانا وبدأوا يغموا عنيا، اتخانقت معاهم، سابوني وقالوا حصلنا على القسم عشان تعرف ابنك ح يروح فين".

 

وتابعت: "كان معاهم رئيس المباحث، هو بيعرفني لأني كنت أنا وبعض الجيران بنقف معاهم في الكماين ونساعدهم أيام مظاهرات 2011 وبحكم شغلي في مكتب المحاماة لي تعاملات مع القسم، الظابط قال لي ابنك بيقطع الطريق الدائري قلت له حرام عليك ده إنت واخده من البيت".

 

وذكرت الرسالة: "أخدوا أكرم ونزلوا، لبست وحصلتهم على قسم شبرا الخيمه ثاني، شوفت هناك 4 أطفال، نزلوهم من العربية على القسم ومنعوني من الدخول، فضلت قاعد قدام القسم لحد الصبح، جت عربية الترحيلات أخدتهم على النيابة، التحقيقات استمرت من عشره صباحًا لحد 6 مساء، بعدين راحوا أمن الدولة، عرفت من ابني بعد كده أنهم ضربوه وكهربوه عشان يعترف إنه قطع الطريق الدائرى بأمر من ولد اسمه ماندو".

 

ومضت الرسالة ترصد: "قرار النيابة كان بترحيل كل من أكرم إبراهيم ولقمان محمد عبد الفتاح ومحمد عبد الستار محمد إلى المؤسسه العقابية بالمرج، لكن كلهم راحوا على معسكر قوات أمن بنها وهو موجود هناك من يومه لغاية دلوقتي وبيتعرض كل 15 يوم ويتجدد له 15 يوم كل مرة، أنا بس اللي بعرف أدخل أشوفهم يوم العرض على النيابه عشان شغلي في مكتب المحاماة، وهم يدوبك كلمتين ويمشونى".

 

واختتمت: "مفيش زيارات خالص، بالعافية بندخل أكل وهدوم مرتين فى الأسبوع، العنابر عبارة عن أرض خرسانة وبرد جدًا ودوخت عقبال ما عرفت أدخل بطاطين للأولاد، سجّلوا لهم فيديو وهما بيعترفوا طلع على القناة الأولى وسي بي سي وأون تي في والأهرام والأخبار والجمهورية. باسم الخلية الإرهابية لأطفال القليوبية، كلهم من سن 14 إلى 18 ومعاهم واحد بس سنه 22".

اقرأ أيضًا:

  • تعليقات فيسبوك
  • اعلان

    اعلان