دعا طاهر مختار، عضو حملة "الإهمال الطبي في السجون جريمة"، إلى ضرورة مسح السجون طبيًا بسبب انتشار مرض "الليشمانيا".

وقال في تدوينة عبر حسابه على موقع التواصل الاجتماعي "فيس بوك": "أنقذوا سجناء وادي النطرون، كل سجناء وادي النطرون (وكمان إدارة السجن من ظباط ومجندين وموظفين) في خطر حقيقي بالإصابة بالليشمانيا اللي هو مرض شديد الخطورة وقد يؤدي للوفاة بعد ما ثبتت إصابة أحمد الخطيب بيه أثناء وجوده في السجن ده، المسح الشامل للمرض في السجن مش رفاهية، بل هو ضرورة ملحة وحتمية لإنقاذ كل المتواجدين في السجن من المرض المهلك ده".

وتابع: "النظام المصري كعادته بيتعامل بتعتيم شديد مع القضية دي، مفيش أي شفافية حوالين إيه اللي حصل مع أحمد الخطيب بعد اكتشاف إصابته بالمرض، احنا عرفنا من مصادر غير رسمية إنه تم نقله لمستشفى حميات العباسية، ولكن هل هو اتنقل للمستشفى لمجرد الحجر الصحي لمنع انتشار المرض، ولا بدأ علاج بالفعل، وهل هل العلاج متوفر ولا لأ دي كلها أمور منعرفش عنها حاجة".

وتابع: "السلطات المصرية متكلمتش كمان حوالين خطتها لمواجهة انتشار المرض وهل تم البدء في المسح الشامل للمنطقة ولا لأ، وزارة الداخلية مسئولة بصفتها مسئولة عن منطقة السجن، وكمان وزارة الصحة (خاصة إدارة الطب الوقائي) مسئولة بصفتها مسئولة عن مواجهة الأمراض الوبائية والوقاية منها في كل أنحاء الجمهورية (وده الحد الأدنى من المسئولية الصحية للدولة لو كانت لسة بتعتبر نفسها دولة أو شبه دولة حتى)".

وواصل: "احنا لازم نكمل ضغط لغاية ما تكون قدامنا حقائق مطمئة بخصوص تعامل النظام مع القصة دي، سواء حالة أحمد تحديدًا أو خطة التعامل لمنع انتسار المرض وإجراء المسح الشامل ونتايجه وخطة التعامل مع باقي الحالات التي سيتم اكتشاف إصابتها إن وجدت".