انتشرت على صفحات التواصل الاجتماعي "فيسبوك" و"تويتر" تعليقات ساخرة على القرار القضائي الصادر اليوم بإخلاء سبيل الرئيس السابق حسني مبارك في قضية "هدايا الأهرام"، وهي القضية الرابعة التي حصل فيها مبارك على قرار بإخلاء سبيله بعد قضايا: قتل المتظاهرين، والكسب غير المشروع، والقصور الرئاسية.

وفيما يلي بعض هذه التعليقات الساخرة:

* الدرس المستفاد من ثورة يناير, ثور زى ما أنت عايز, الثورة شىء جميل وصحى, المهم بعد ما تخلص ترجع كل حاجة مكانها زى ما كانت بالظبط.، عشان كل ما تحب تثور أسيبك تثور.

* م الأول وجديد.. ها.. هاينفع نثور تاني.. ولا خلاص.. أحبطوا.. احنا نستنا الجيل الجاي يعمل هو الموضوع ده بقه.. احنا كفاية علينا كده.. حاولنا جاهدين. بس ماظبططش.

*مبارك برىء ياجدعاااااان.. ألف حمدالله على سلامتك ياريس.. مش كنت تيجي.. سجون مصر لا تحتمل رئيسين محبوسين..

*مبارك علينا الحيط ال لبسناه.

* مبارك يسحب تفويضه للمجلس العسكري ويعود لحكم جمهورية مصر العربية.

* قريبا على شريط "عاجل" .. والنبي وحشتنا خطاباتك بس أكيد هايغير "الأخوة المواطنون" عشان ماتبقاش أخونة.

* لو مبارك خرج من السجن إحتمال كبير ينفخ مصطفى بكرى ولميس ومصطفى الفقى وأحمد موسى والغيطى وكل الكتاب والمذيعين اللى شتموه بعد مامشى وكانوا بيكتبوا عن حكمته قبل مايتنحى .. خليك إيجابي.

* عاجل: فى أول تصريح له، مبارك: سأنضم لجبهة الإنقاذ فور خروجى بس بشرط يمشى عمرو موسى عشان فلول.

* مبارك خرج، طيب والعادلي الغلبان ده إيه ظروفه؟

* بو عييييييييلاء أخد براءة..

* على فكرة أنا كنت نازلة يوم 25 يناير 2011 ..اشترى حاجات من الشارع و ولاد الحرام ضحكوا عليا وفهمونى إن المظاهرات دي طوابير كبيرة لناس بتعمل بطايق تموين .. الله يسامح ولاد الحرام بقى ..

* حبيبى يا أبو علاء.. احنا من ساعة دخولك السجن موصلناش كاس أفريقيا يا ريس.. عشان قلبنا اسود.

* بعد قليل: مبارك على القنوات المصرية مباشرة في كلمة هامة للشعب المصري:

* مبارك: أيها الأخوه والأخوات ها أنا بعد إثبات براءتي من كل التهم....!!!! أتحدث إليكم حديث الأب لأبنائه حديثا من القلب لقد تخليت مؤقتا عن السلطة وفوضت المجلس العسكري ومن بعده الإخوان وذلك لتحقيق أعلى درجات نزاهة التحقيقات معي، أما الآن وبعد البراءة فكل واحد أولى بشعبه .. ولا إيه؟!! وعلى الرغم أنه ما زال يحز في نفسي ما لقيته من أبناء شعبي لكن برضه المسامح كريم، لذا أعلن انتهاء تفويضي للمجلس العسكري واستلامي مقاليد البلاد من تاني واحنا في النهاية ملناش غير بعض ودي كانت ساعة شيطان وأهي راحت لحالها والله الموفق والمستعان.

* وتكتب د.نادية مصطفى في شىء من الجدية: الرئيس الذي خلعته الثورة يحصل على البراءة، وزعيمان لرافدين من الثورة : الليبرالي والإسلامي يتم القبض على أحدهما ويتم اتهام الآخر بالخيانة!!! والأعجب هو تعليقات صبيان جبهة الإنقاذ عن أن القضاء هو الذي يقول كلمته. هل أحكام القضاء مطلقة لا يمكن التعليق عليها مخافة تلفيق تهمة إهانة القضاء!!! أم أن القضاء المسيس هو الحليف لِقادة جبهة الإنقاذ وصبيانهم وشريكهم في الإعداد للانقلاب بثورة مضادة على الإخوان وعلى ثورة 25 يناير.

* فهنيئًا لكم جميعًا بعودة مبارك وانقلابكم على شريككم د.البرادعي، ولتنتظروا ما سيفعله بكم "العسكر" وحلفاؤه المقربون الآن (أصحاب المصالح لا المبادئ).

* ويكتب أحمد المصري متفائلا: انسى خالص أي حاجة حصلت بعد يوم 11 فبراير، امسحها من ذاكرتك، عشان دي كانت أكبر لعبة اضحك علينا بيها.. هننزل نكمل ثورتنا بمطالبها الأولى: عيش .. حرية .. عدالة اجتماعية .. خروج من الهيمنة الأمريكية.

* وفي الآخر يجتمع البعض على القول: ياثورة ما تمت.. وياريتها ما قامت م الأول.