اتكلمنا امبارح عن أول يوم تنضيف قبل العيد بأسبوع ووضحنا فيه إننا هانبدأ مع بعض واحدة واحدة عشان مانرهقش نفسنا ونتعب نفسيتنا ويتكركب علينا الشغل كله فى يوم واحد اللى غالبا بيكون يوم الوقفة.. وقلنا كمان إننا هانبدأ بلم الستاير والفرش ونغسلهم وننضف البلكونة ونشمس السجاد والمراتب والمخدات وكان ده أول يوم تنضيف.. النهاردة بقى هانتكلم عن أصعب يوم ست البيت بتشيل همه على طول وهوا يوم تنضيف المطبخ ومابالك بيوم المطبخ..

لأن المطبخ تنضيفه بياخد وقت وجهد مننا فابيبقى أفضل إننا نبتدى بيه ..وهاقولكم على الخطوات واحدة بواحدة اللى تخلينا ننجزه فى أقصر وقت وبدون جهد كبير:

أولا: تكونى مجهزه أكل اليوم ده قبلها  لأن المطبخ هايبقى تحت النضافة ومش فاضى لموضوع الأكل خالص النهاردة.

ثانيا :حاولى إنك تطفى التلفزيون وماتقوليش لنفسك أتابع مسلسل أو برنامج كده على السريع وأنا بنفض لأنك هاتنشغلى بيه وهايعطلك على الإنجاز بسرعة.

ثالثا: إبدأى بتنضيف التلاجة وافصلى كهربتها وفضيها كلها وخدى الأرفف فى حوض المطبخ وبميه دافية وبصابون إغسليهم..وباسفنجة مبللة و عصير ليمون إغسلى بقية التلاجة من جوة كويس ونشفيها بقطعة قماش وسيبيها تتهوى لحد ماتخلصى بقيت المطبخ

رابعا: زعفى المطبخ ونفضى الشباك واخلعى الشفاط واغسليه وسيبيه ينشف لحد ماتخصلى التنضيف وعلقيه مكانه تانى على طول فى الآخر.

خامسا: إخلعى كل عيون البوتجاز وهاتى طبق كبير فيه ميه سخنة وخل وليمون وسيبهم  يتنقعوا شوية لحد ماتغسلى بقيت البوتجاز وبعد كده ادعكيهم بسلكة هاتلاقى كل الوساخة اللى حواليهم اختفت..

سادسا: نيجى بقى لتنضيف  سطح البوتجاز نفسه أولا بالخل وادعكيى باسفنجة عشان ماتجرحيش السطح وبعد كده امسحية بقطعة قماش مبللة وبميه دافيه وصابون وخميرة اغسليه مره كمان هاتلاقيه بيلمع ونضيف ..نشفى العيون كويس وركبيها تانى مكانها

سابعا : وبالنسبة لفرن البوتجاز بأسفنجة  ومية سخنة وصابون وادعكى كويس اوى ولو حسيتى إن لسه فيه بقع وترسبات رشى جوة الفرن ملح خشن وبعدين بميه سخنة ادعكيه هاتلاقى كل ده طلع معاكى.

ثامنا: زجاج البوتجاز والفرن ابدأى بيهم الأول وحطى عليهم بيكربونات الصودا مرطبة بالمية وفى الآخر بعد ماتخلصى كل البوتجاز افركيهم لتنضيفهم.

تاسعا: بعد ماخلصنا من البوتجاز والثلاجة والشباك نبدأ فى غسل الحيطان بأسفنجة ومسحوق وميه وبعد كده اغسليهم بالميه ونشفيها بقطعه قماش جافة.

10- رتبى دواليب المطبخ وغيرى فرشهم وكل دولاب تخلصى منه اغسلى درفته من بره باسفنجة وصابون.

11- اغسلى الحوض كويس وادعكيه بمسحوق وبعدين امسحى سيراميك المطبخ بالميه الدافيه والكلور ومسحوق عشان ينضف كويس.

12- فى الآخر تكون التلاجة نشفت رصى الحاجات تانى فيها وحطى جواها قطعة قماش عليها فانيليا عشان تبقى ريحتها دايمة حلوة.

وبكدة تكونى خلصتى من المطبخ من 2- 4 ساعات تقريبا مش اليوم كله زى ماكنتى بتعلمى كل سنة..

وبكرة نكمل بقية حملة التنضيف. تابعينا