رئيس التحرير: عادل صبري 10:31 صباحاً | الثلاثاء 19 مارس 2024 م | 09 رمضان 1445 هـ | الـقـاهـره °

ابن عم المقدم عماد الركايبي: «لم يحتضن الانتحاري.. وكفاية متاجرة بدمه»

ابن عم المقدم عماد الركايبي: «لم يحتضن الانتحاري.. وكفاية متاجرة بدمه»

ميديا

المقدم الراحل عماد الركايبي

ابن عم المقدم عماد الركايبي: «لم يحتضن الانتحاري.. وكفاية متاجرة بدمه»

طارق عزام 10 أبريل 2017 19:32

أكد أحمد الركايبي، ابن عم المقدم الراحل عماد الركايبي، ضحية تفجير الكنيسة المرقسية بالإسكندرية، أن ابن عمه لم يحتضن الانتحاري، كما تداولت بعض المواقع الإخبارية ومواقع التواصل الاجتماعي.

 

وكتب أحمد الركايبي، عبر حسابه الشخصي على موقع «فيس بوك»: «مع إني في الفترة الأخيرة مش بتكلم في أي حاجة.. بس اللي حصل ده لازم يخليك تتكلم.. ربنا يرحمك يا ابن عمي.. وبنحتسبك عند ربنا من الشهداء.. وربنا يصبرنا على فراقك».


وأوضح أحمد الركايبي: «في البلد دي ياريت متعملش شير حاجة من غير ما تشوف.. ولما تشوف برضو متعملش شير علشان احنا أقسم بالله في مستنقع زبالة. في ناس بتقول إنه ابن عمي حضن اللي كان داخل يفجر نفسه، وفيه فيديو اللي كل الناس شافته و الواد بيفجر نفسه عند البوابة، وأنا بتكلم علشان مش عاوز حد يتاجر بدم واحد من أقرب الناس ليا، ابن عمي بطل في نظري.. مش شرط إنه يحضن الإرهابي علشان يكون بطل».

 

وتابع أحمد الركايبي: «هو بطل علشان هو أنضف ظابط شفته في حياتي.. عمره ما جه على حد ـو ظلم حد.. قدامي حصل أكتر من موقف كان ممكن يستخدم فيها القانون علشان يحبس ناس ولكن كان بيستخدم روح القانون.. وبيدي للمخطئ درس عمره ما ينساه».


وأكمل أحمد: «هو بطل علشان يوم الانفجار نازل من بيته 4 الفجر علشان يأمن الكنيسة، مع إنه بكل سهولة كان ممكن ميروحش، ومحدش في الشرطة كان حيقدر يكلمه، علشان احنا عيلة عندها كمية رتب مش طبيعية».


وأضاف أحمد: «هو بطل علشان قبل التفجير بـ 10 دقايق كلمه السواق بتاعه وقاله في تفجير في طنطا يا باشا، لو عاوزني أجيلك و تروح.. فقاله لا ربنا يستر وماسبش مكان خدمته وروح لأطفاله الـ3 اللي مش حيشفوه ولا حيشفهم تاني».


واختتم أحمد حديثه قائلًا: «مش شرط إن انت تشوفوا بطل، وميهمنيش إنك تشوفه بطل، بس ياريت تدعيله وتدعيلنا معاه، ومتنساش إننا كعيلته ماتجرناش بدم ابننا ولا عاوزين حد يتاجر بيه.. فياريت بلاش كلام إنكم عاوزين تعملوا منه بطل و هو معملش حاجة.. احنا فينا اللي مكفينا».

 

 

وتداول مستخدمو "فيس بوك" بكثرة صورة زعموا أنها لـ"الركايبي" وهو يستوقف الانتحاري قبل أن يفجر نفسه، إلا أن فيديو كاميرا المراقبة التي رصدت لحظة وقوع الانفجار، نفت هذه الرواية، إذ كان يرتدي منفذ التفجير ملابس زرقاء، حسبما أظهرت الكاميرا، بينما كان يرتدي الرجل في الصورة المتداولة سترة حمراء.

 

وقتل ما لا يقل عن 44 شخصًا، من بينهم عماد الركايبي، أمس الأحد، وأُصيب أكثر من 120 آخرين، جراء التفجيريين اللذان ضربا كنيسة مارجرجس في طنطا والكنيسة المرقسية في الإسكندرية.

انفجارات كنائس طنطا والإسكندرية
  • تعليقات فيسبوك
  • اعلان

    اعلان