قال الرئيس عبدالفتاح السيسي، إن الدولة المصرية تسير في خطة طرح عدد من الشركات والأصول الحكومية في البورصة المصرية منذ 3 سنوات
وأضاف الرئيس في كلمته على هامش افتتاح مصنع الغازات الطبية والصناعية رقم 3 التابع لشركة النصر للكيماويات، اليوم الخميس: "شغالين في موضوع الطرح في البورصة من 3 سنين لكن لسه منزلش الحجم المناسب".
وتابع السيسي: "قولنا الطروحات اللي الدولة المصرية بتجهزها لطرحها في البورصة لابد يكون فيه فرصة منها لشركات القوات المسلحة، لازم الشركات دي تدخل البورصة ويبقى فيه فرصة للمصريين يكون لهم أسهم في هذه الشركات، ونفتح باب المشاركة المجتمعية في هذه الشركات".
وواصل: "القطاع الخاص مرحب بيه عايز يشارك ده متاح، وده مش كلام سياسة، أنت مش هتدخل في دراسات جدوى وتراخيص، كل ده خلصان، ننزل شركات قطاع الأعمال أو الشركات دي علشان ندي فرصة أكبر للمصريين للمشاركة".
ووجه الرئيس عبدالفتاح السيسي، رسالة شكر وتقدير للقائمين على إنشاء وإنهاء مصنعي الغازات الطبية والصناعية وفوق أكسيد الهيدروجين: "كل الشكر والتقدير ليكم".
وأضاف: "مهم أقول إن إحنا كمصريين لازم نعرف إن القوات المسلحة لما تقوم بالدور ده مش على حساب القطاع الخاص أو المدني بالعكس ده بالشراكة معاه، هنا بنتكلم على مصانع خاصة بالشركة دي، لكن كل القطاع المدني شغال في مصانع القوات المسلحة".
وتابع الرئيس السيسي: "منتجات أو مواد استراتيجية مهمة زي موضوع مياه الشرب والغازات الطبية وغيرها لازم ميحصلش مشكلة فيها، يعمل في الشركات دي عشرات الآلاف من المصريين".
وواصل:"يا ترى الصوب الزراعية اللي اتعملت دي تفتكروا لما يكون فيه 10 آلاف فدان صوب زراعية كام شاب وفتاة هيشتغلوا فيهم؟ ده اللي يهمنا إن ندي للناس أمل في التغيير وتوفير فرص العمل، القطاع الخاص مرحب به للشراكة في كل اللي بنقول عليه ده".
وافتتح الرئيس عبدالفتاح السيسي، اليوم الخميس، مصنع الغازات الطبية والصناعية رقم 3، التابع لشركة النصر للكيماويات الوسيطة.
واستمع الرئيس السيسي إلى شرح تفصيلي عن عمل مصنع الغازات الطبية والصناعية، خلال جولة تفقدية داخل المصنع، بحضور الدكتور علي عبدالعال، رئيس مجلس النواب، والدكتور مصطفى مدبولي رئيس مجلس الوزراء، وعدد من الوزراء والمسؤولين.
يذكر أن شركة النصر للكيماويات إحدى قلاع مصر الوطنية، والتي شهدت تطورًا خلال الـ6 سنوات الماضية، واستطاعت فتح عدة مصانع في مجالات الكيماويات المتوسطة.
